Հինգշաբթի, 24 Յուլիս 2014

«Հայաստան» Հիմնադրամը Շուշիի մէջ ուսումնարան կը կառուցէ

ՏպելԷլ.փոստ

Դասաւորում - Հայաստան-Արցախ

ԵՐԵՒԱՆ, «Թերթ».- «Հայաստան» համահայկական հիմնադրամի Ֆրանսայի տեղական մարմինը Լեռնային Ղարաբաղի Շուշի քաղաքին մէջ կը կառուցէ արհեստագործական ուսումնարան: Կրթօճախը կեանքի կը կոչուի Եզնիկ Մոզեանի կտակած գումարներով եւ կը կրէ ֆրանսահայ բարերարին անունը:

Երկյարկանի նորակառոյց ուսումնարանը նախատեսուած է 225 ուսանողի համար: Ուսումնարանը պիտի ունենայ հանրակրթական առարկաներու եւ արհեստներու ուսուցման համար անհրաժեշտ բոլոր յարմարութիւնները: Արդէն սկսած են կառոյցի հողային աշխատանքները:
«Ուսումնարանը նախագծուած է ֆրանսական նմանատիպ մասնագիտական կրթօճախներու օրինակով՝ հիմնուելով Հիմնադրամի Ֆրանսայի գրասենեակի մասնագիտական յանձնաժողովի առաջարկներուն վրայ: Դպրոցի մանկավարժական կազմը պիտի վերապատրաստուի ժամանակակից ամենաարդիւնաւէտ ուսումնական եղանակներով դասաւանդելու նպատակով», կը նշէ Եզնիկ Մոզեանի ընտանիքի ներկայացուցիչ Ռոպերթ Այտապիրեան, որ նաեւ ծրագիրին գլխաւոր համակարգողն է:
Եռամեայ կրթութիւն ստանալէ ետք՝ ուսումնարանի սաները ձեռք պիտի բերեն փականագործի, մետաղագործի, ներկարարի, տանիքագործի, սալիկապատողի, ելեկտրականագէտի մասնագիտութիւններ եւ պիտի համալրեն տեղի աշխատանքային շուկան, ուր վերոյիշեալ մասնագէտներու մեծ պակաս կայ:
«Ուսումնարանը պիտի ունենայ ննջարանային մասնաշէնք եւ պիտի կարողանայ իր յարկին տակ ընդունիլ նաեւ Արցախի եւ Հայաստանի մարզերէն եկած ուսանողներ: Անիկա պիտի ունենայ տարածաշրջանին մէջ իր տեսակին մէջ ամէնէն առաջատար կրթօճախը դառնալու բոլոր նախապայմանները», կը նշէ Հայաստան համահայկական հիմնադրամի Ֆրանսայի տեղական մարմինի ատենապետ Պետրոս Թերզեան:
Արհեստագործական ուսումնարանը կը կառուցուի Շուշիի արեւելեան թաղամասին մէջ, որ կը յաւակնի դառնալու ուսումնական թաղամաս, քանի որ այնտեղ կեդրոնացած են գրական թեքումով եւ երաժշտական դպրոցներ, ինչպէս նաեւ Արցախի Պետական համալսարանի գիւղատնտեսական բաժանմունքը:

Share
κατοχυρώσεις ονομάτων.....