Իտալական Թուրինը ճանչցաւ Հայոց ցեղասպանութիւնը

Երկուշաբթի, 20 Փետրուար 2012 11:46

Դասաւորում - Հայ Դատ

Իտալական Թուրին քաղաքի քաղաքային խորհուրդը միաձայնութեամբ ճանչցաւ Հայոց Ցեղասպանութիւնը: Յաւելեալ՝ բանաձեւ ընդունուեցաւ, ուր կոչ կ'ուղղուի Եւրոխորհրդարանին այնպէս գործել, որ Եւրոպական Միութեան անդամ դառնալու յաւակնութիւններ ունեցող Թուրքիան ճանչնայ Հայոց Ցեղասպանութիւնը, կը տեղեկացնէ novostink.ru-ն:

Վաւերացուած փաստաթուղթին մէջ հակիրճ ներկայացուած են 20-րդ դարասկզբի իրադարձութիւնները, հայութեան ջարդերը, անոնք որպէս Ցեղասպանութիւն նկարագրելով: Նշում կատարուած է նաեւ այն երկիրներու, քաղաքներու եւ միջազգային կազմակերպութիւններու մասին, որոնք պաշտօնապէս ճանչցած են հայ ժողովուրդի նկատմամբ իրականացուած ոճիրը, անոնց շարքին ներառնելով ՄԱԿ-ի Մարդու իրաւունքներու յանձնաժողովը եւ Եւրոպական խորհրդարանը:
Տուեալ բանաձեւով թուրինցիները կոչ ուղղած են բոլոր երկիրներուն, որպէս պարտադիր ազդակ՝ ճանչնալ պատմական այդ իրողութիւնը: