Ուրբաթ, 31 Հոկտեմբեր 2014

Արձագանգ՝ Հ.Օ.Մ.ի կեանքէն - ՀՕՄ-Ը ՆԻՒ ԵՈՐՔԻ ԿԵԴՐՈՆ՝ ԹԱՅՄԶ ՀՐԱՊԱՐԱԿԻՆ ՎՐԱՅ

ՏպելԷլ.փոստ

Դասաւորում - Միջազգային - գաղութային լուրեր

Օգտուելով բացառիկ առիթէ մը եւ նկատի ունենալով ՄԱԿ-ի Կանանց Իրավիճակի 56-րդ Խորհրդաժողովի գումարումը, ՀՕՄ-ի Կեդրոնական վարչութիւնը Նիւ Եորքի Թայմզ հրապարակի պաստառներէն մէկուն վրայ ՀՕՄ-ի ծանուցում մը տեղադրած է։

30 երկվայրկեան տեւողութեամբ ծանուցումը Փետրուար 18-էն մինչեւ Ապրիլ 18 ժամական մէկ անգամ պիտի ցուցադրուի Մանհաթանի 42-րդ փողոցի վրայ, 7-րդ եւ 8-րդ պողոտաներուն միջեւ գտնուող CBS ընկերութեան հսկայ պաստառին վրայ։

Ծանուցումի ամբողջութիւնը կարելի է տեսնել այցելելով ՀՕՄ-ի կայքէջը (www.ars1910.org

 

ՀՕՄ-Ը ԿԸ ՄԱՍՆԱԿՑԻ ՄԻԱՑԵԱԼ ԱԶԳԵՐՈՒ ԿԱԶՄԱԿԵՐՊՈՒԹԵԱՆ
ԿԱՆԱՆՑ ԻՐԱՎԻՃԱԿԻ 56-ՐԴ ԽՈՐՀՐԴԱԺՈՂՈՎԻՆ

Հայ Օգնութեան Միութիւնը պիտի մասնակցի Միացեալ Ազգերու Կազմակերպութեան Կանանց
Իրավիճակի 56-րդ Խորհրդաժողովին, որ պիտի գումարուի Նիւ Եորքի մէջ Փետրուար 27-էն Մարտ 9-ի միջեւ։
Կանանց Իրավիճակի Խորհրդաժողովը ՄԱԿ-ի գլխաւոր կառոյցն է, որ բացառապէս կը զբաղի սեռերու հաւասարութիւնը եւ կանանց յառաջդիմութիւնը ապահովող քաղաքականութեան մշակումով։ Պետութիւններու, ոչ-կառավարական կազմակերպութիւններու եւ մասնաւոր հատուածի ներկայացուցիչներ ամէն տարի կը հաւաքուին ՄԱԿ-ի մէջ քննելու համար կանանց վերաբերող կարեւորագոյն խնդիրները։ Այս տարուան հիմնական թեման է՝ «Գիւղական միջավայրի մէջ ապրող կանանց հզօրացումը եւ անոնց դերը աղքատութեան ու սովի վերացման մէջ, անոնց զարգացումն ու դիմագրաւած մարտահրաւէրները»։
Որպէս կանանց հարցերն ու իրաւունքները քննող միջազգային հիմնական բեմ, ՀՕՄ-ը այս խորհրդաժողովին կը մասնակցի զանազան մակարդակներու վրայ եւ հագեցած ծրագրով։ Այս տարի ՀՕՄ-ը իր նախաձեռնութիւններու շարքը սկսաւ Կանանց Միջազգային Դրամատան հետ գործակցաբար գրաւոր խօսք մը փոխանցելով ՄԱԿ-ի Կանանց Կառոյցին, որ զայն ընդունեց ու տեղադրեց Կանանց Իրավիճակի 56-րդ խորհրդաժողովի պաշտօնական կայքէջին վրայ, որպէս խորհդաժողովի պաշտօնական փաստաթուղթ (տեսնել՝ http://www.un.org/womenwatch/daw/csw/56sess.htm հասցէն)։
Ասոր կողքին, ՀՕՄ-ը երկու ձեռնարկ կազմակերպած է եւ երրորդ մը կը հովանաւորէ Կանանց Իրավիճակի Խորհրդաժողովի աշխատանքներու առաջին շաբթուան ընթացքին։ Չորեքշաբթի 29 Փետրուարին, ժամը 2.30-ին ՀՕՄ-ը Կանանց Միջազգային Դրամատան հետ կը կազմակերպէ քննարկում մը՝ «Հզօր կանանց ֆինանսաւորումը.- միքրոֆինանսաւորման ու կանանց առողջապահութեան համարկումը» թեմայով։ Քննարկումին պիտի մասնակցին Միռնա Քանինկհամ-Քէյնը (Կանանց Իրավիճակի Խորհրդաժողովի Ոչ-Կառավարական Կազմակերպութեան Տարուան Կինը մրցանակի այս տարուան թափնեկիր), Ինեզ Միւրէյը (Կանանց Միջազգային Դրամատան Յարաբերական աշխատանքի գծով փոխ-տնօրէն) եւ Ճուտիթ Պրուսը (Բնակչութեան Խորհուրդի գլխաւոր վերլուծաբան)։ Քննարկումը պիտի ղեկավարէ ՀՕՄ-ի ՄԱԿ-ի աշխատանքներու յանձնախումբի ատենապետ Սթեֆանի Քիլեանը։
Այս քննարկումէն անմիջապէս ետք, յետմիջօրէի 4.30-ին, ՀՕՄ-ը կը հովանաւորէ աշխատանիստ մը՝ Վըրճինիա Կիլտըրսլիվ Միջազգային Ֆոնտին, Սորոբթիմիստ Միջազգայինին, Համալսարանական Կանանց Ամերիկեան Միութեան, Մոքա Կաքայ Միջազգայինին, Ամերիկայի Համալսարանաւարտ Կանանց միութեան եւ Համալսարանական Կանանց Միջազգային Դաշնակցութեան հետ միասին։ Այս աշխատանիստի թեման է՝ «Գիւղական պայմաններու մէջ ապրող կանայք եւ աղջիկներ.- վերարտադրողական առողջապահութեան խնդիրներ»։
Զոյգ նիստերը տեղի պիտի ունենան Չըրչ կեդրոնին մէջ եւ բաց են հանրութեան։
Ուրբաթ, 2 Մարտին, ժամը 11.30-էն մինչեւ 12.45, ՀՕՄ-ը կը կազմակերպէ բարձրաստիճան քննարկում մը, որուն իր մասնակցութիւնը պիտի բերէ ՄԱԿ-ի մօտ Հայաստանի Հանրապետութեան լիազօր ներկայացուցիչ դեսպան Կարեն Նազարեանը։ Անոր պիտի միանան Կանանց Միջազգային Դրամատան Գործադիր տնօրէն Մերի Էլլեն Իսքենտերեանը եւ Մաքետա Միջազգայինի Գործադիր Տնօրէն Մերիլ Ֆրանքը, որ ատենօք ծառայած է որպէս ՄԱԿ-ի Կանանաց Իրավիճակի խորհրդաժողովին մօտ Ամերիկայի Միացեալ Նահանգներու ներկայացուցիչ։ Այս քննարկումին ՀՕՄ-ը պիտի ներկայացնէ Սթեֆանի Քիլեանը, որ պիտի անդրադառնայ միութեան տասնամեակներու վրայ երկարող աշխատանքին Հայաստանի թէ Սփիւռքի մէջ գիւղական միջավայրի մէջ ապրող կանանց ծառայութեան ի խնդիր։ Քննարկումի թեման պիտի ըլլայ՝ «Հզօրացումէն կայունութիւն.- գիւղական միջավայրի մէջ ապրող կանանց ֆինանսաւորում, առողջապահութիւն եւ հանրային կեանքի մասնակցութիւն»։
«Ոչ-Կառավարական կազմակերպութիւններու մասնակցութիւնը հիմնական է Կանանց Իրավիճակի Խորդհրդաժողովի յաջողութեան համար։ ՀՕՄ-ի կողմէ կազմակերպուած աշխատանիստերու կողքին ՀՕՄ-ականներ իրենց մասնակցութիւնը պիտի բերեն խորհրդաժողովի պաշտօնական լիգումար նիստերուն ու զանազան կազմակերպութիւններու աշխատանիստերուն։ ՀՕՄ-ի մասնակցութիւնը Կանանց Իրավիճակի 56-րդ խորհրդաժողովին առիթ պիտի ընծայէ սեռերու հաւասարութեան ընթացքի արժեւորման, մարտահրաւէրներու յստակեցման եւ միջազգային տարողութեամբ չափանիշներու ճշդումին, որոնք պիտի նպաստեն գործնական քայլերու մշակման որպէսզի ՄԱԿ-ի Տնտեսական եւ Ընկերային Խորհուրդին ճամբով յաւելեալ թափ տրուի սեռերու հաւասարութեան գաղափարին ու կանանց հզօրացման»,- յայտարարեց ՀՕՄ-ի Կեդրոնական վարչութեան ատենապետ Վիգի Մարաշլեանը։ Ան պիտի գլխաւորէ Կանանց Իրավիճակի 56-րդ Խորհրդաժողովին մասնակցող ՀՕՄ-ի պատուիրակութիւնը։


 

Share
κατοχυρώσεις ονομάτων.....